સોનું રૂ.3,000 અને ચાંદી રૂ.9,000 મોંઘી : નવરાત્રી-દિવાળીએ ભાવ રેકોર્ડ બનાવશે?
ભારતમાં તહેવારો અને ખરીદીની સીઝન શરૂ થાય તે પહેલાં જ સોના-ચાંદીના ભાવમાં જોરદાર તેજી જોવા મળી છે. રાજકોટમાં આજે સોનાના ભાવમાં રૂ.3,000નો અને ચાંદીમાં રૂ.9,000નો મોટો ઉછાળો નોંધાયો છે.
રાજકોટમાં હાજર સોનું વધીને રૂ.1,64,800 પ્રતિ 10 ગ્રામ, જ્યારે હાજર ચાંદી રૂ.2,53,800 પ્રતિ કિલો પહોંચી છે. છેલ્લા બે દિવસમાં જ સોનાના ભાવમાં રૂ.7,000નો જ્યારે ચાંદીમાં રૂ.12,900નો વધારો નોંધાતા બજારમાં ભારે ચર્ચા શરૂ થઈ છે.
વેપારીઓના મતે અમેરિકા સહિતના વૈશ્વિક ઘટનાક્રમો અને અમેરિકાના સારા આર્થિક ડેટાની અસર કિંમતી ધાતુઓના ભાવ પર જોવા મળી રહી છે. હવે નવરાત્રી અને દિવાળી દરમિયાન સોના-ચાંદીના ભાવ નવા રેકોર્ડ સ્તરે પહોંચશે કે કેમ તેના પર બજારની નજર છે.
દરમિયાન શેરબજારમાં આજે ખાસ મોટી મુવમેન્ટ જોવા મળી નહોતી. સેન્સેક્સ 8 પોઈન્ટ વધીને 77,545 અને નિફ્ટી 9 પોઈન્ટ વધીને 24,240 પર બંધ રહ્યો હતો.
