કુંકાવાવ રેલવે ફાટક નજીક LCBએ પીછો કરીને 346 બોટલ દારૂ કબજે કર્યો; એક આરોપી ઝડપાયો, મુખ્ય આરોપી ફરાર
અમરેલી જિલ્લા લોકલ ક્રાઇમ બ્રાન્ચ (LCB) દ્વારા વડીયા પોલીસ સ્ટેશન વિસ્તારમાં દારૂની હેરાફેરી સામે કાર્યવાહી કરવામાં આવી છે. કુંકાવાવ રેલવે ફાટક નજીકથી પસાર થતી એક શંકાસ્પદ કારને રોકવાનો પ્રયાસ કરતાં ચાલકે કાર ભગાવી હતી. જોકે, પોલીસે પીછો કરીને કારને અટકાવી તપાસ કરતાં તેમાંથી રૂ. 1.83 લાખની કિંમતની વિદેશી દારૂની 346 બોટલો મળી આવી હતી. પોલીસે એક શખસને ઝડપી પાડ્યો હતો, જ્યારે દારૂના જથ્થા સાથે સંકળાયેલો મુખ્ય આરોપી ફરાર થઈ ગયો હતો.
પોલીસે પીછો કરીને કાર અટકાવી
મળતી માહિતી અનુસાર, અમરેલી LCBની ટીમ વડીયા વિસ્તારમાં પેટ્રોલિંગ કરી રહી હતી. આ દરમિયાન મળેલી બાતમીના આધારે કુંકાવાવ રેલવે ફાટક નજીક વોચ ગોઠવવામાં આવી હતી. ત્યાંથી શંકાસ્પદ રીતે પસાર થતી કારને રોકવાનો પ્રયાસ કરવામાં આવતાં કારચાલકે વાહન ભગાવ્યું હતું. ત્યારબાદ પોલીસે પીછો કરી કારને આંતરી લીધી હતી.
કારની તપાસ દરમિયાન સાગર થળેચા નામના શખસને ઝડપી પાડવામાં આવ્યો હતો. પોલીસે કારમાંથી વિદેશી દારૂની કુલ 346 બોટલો કબજે કરી હતી, જેની કિંમત આશરે રૂ. 1.83 લાખ હોવાનું જાણવા મળ્યું છે.
રૂ. 4.93 લાખનો મુદ્દામાલ જપ્ત
પોલીસે દારૂની બોટલો ઉપરાંત દારૂની હેરાફેરીમાં ઉપયોગમાં લેવાયેલી કાર અને મોબાઇલ ફોન પણ કબજે કર્યા હતા. આ તમામ મુદ્દામાલની કુલ કિંમત આશરે રૂ. 4.93 લાખ આંકવામાં આવી છે.
પ્રાથમિક તપાસ દરમિયાન દારૂના જથ્થા સાથે સંકળાયેલા મુખ્ય આરોપી તરીકે રવિરાજ વાળાનું નામ સામે આવ્યું હતું. જોકે, તે પોલીસના હાથે લાગ્યો ન હોવાથી તેની શોધખોળ હાથ ધરવામાં આવી છે.
ફરાર આરોપીને ઝડપી પાડવા તપાસ તેજ
આ બનાવ અંગે વડીયા પોલીસે ગુનો નોંધી આગળની કાયદેસરની કાર્યવાહી શરૂ કરી છે. દારૂનો જથ્થો ક્યાંથી લાવવામાં આવ્યો હતો, કોને પહોંચાડવાનો હતો અને આ હેરાફેરીમાં અન્ય કોઈની સંડોવણી છે કે કેમ તે અંગે તપાસ કરવામાં આવી રહી છે. ફરાર મુખ્ય આરોપી રવિરાજ વાળાને ઝડપી પાડવા માટે પોલીસે તપાસનાં ચક્રો ગતિમાન કર્યાં છે.
