ગુજરાત સ્ટેટ રોડ ટ્રાન્સપોર્ટ કોર્પોરેશન (GSRTC) દ્વારા મુસાફરોની સુવિધા માટે મહત્વનો નિર્ણય લેવામાં આવ્યો છે. હવે બસ સ્ટેશનના કાઉન્ટર પરથી ટિકિટ બુક કરાવ્યા બાદ કાગળની ટિકિટ સાચવી રાખવાની જરૂર નહીં પડે. ટિકિટ બુક કરાવતી વખતે આપેલા મોબાઈલ નંબર પર SMS મોકલવામાં આવશે અને મુસાફરી દરમિયાન આ SMS બતાવીને ટિકિટ માન્ય કરાવી શકાશે.
રેલવેની જેમ હવે GSRTCમાં પણ મોબાઈલમાં આવેલા ટિકિટ SMSના આધારે મુસાફરી કરી શકાશે. જોકે, SMS ટિકિટ સાથે મુસાફરે ઓરિજિનલ ઓળખપત્ર રાખવું ફરજિયાત રહેશે. ટિકિટ ચેકિંગ દરમિયાન કંડક્ટર SMSની સાથે માન્ય ઓળખપત્ર પણ ચકાસી શકે છે.
કાઉન્ટર પરથી ટિકિટ બુક કરાવ્યા બાદ SMS મળશે
અત્યાર સુધી કાઉન્ટર પરથી ટિકિટ લીધા બાદ મુસાફરોએ કાગળની ટિકિટ સાચવી રાખવી પડતી હતી. ટિકિટ ખોવાઈ જાય કે ફાટી જાય તો મુશ્કેલી ઊભી થતી હતી. હવે કાઉન્ટર પરથી ટિકિટ બુક કરાવ્યા બાદ રજિસ્ટર્ડ મોબાઈલ નંબર પર તેનો SMS મોકલવામાં આવશે.
મુસાફરી દરમિયાન કંડક્ટર ટિકિટ ચેક કરે ત્યારે મોબાઈલમાં આવેલો SMS બતાવી શકાશે. આથી કાગળની ટિકિટ સાચવવાની જરૂરિયાત ઘટશે અને મુસાફરો માટે ડિજિટલ રીતે ટિકિટ રજૂ કરવાનું સરળ બનશે.
ઓરિજિનલ ID પ્રૂફ સાથે રાખવું પડશે
SMSમાં ટિકિટ મળ્યા બાદ પણ મુસાફરે મુસાફરી દરમિયાન અસલ ઓળખપત્ર સાથે રાખવું પડશે. કંડક્ટર જરૂરિયાત મુજબ SMS ઉપરાંત ID પ્રૂફની પણ ચકાસણી કરી શકે છે. મુસાફરો આધાર કાર્ડ, ડ્રાઇવિંગ લાઇસન્સ અથવા અન્ય માન્ય સરકારી ઓળખપત્ર સાથે રાખી શકશે.
રેલવે બાદ હવે STમાં પણ ડિજિટલ સુવિધા
રેલવેમાં મોબાઈલમાં ઉપલબ્ધ ટિકિટની વિગતો બતાવીને મુસાફરી કરવાની સુવિધા પહેલેથી જ છે. હવે GSRTCની કાઉન્ટર ટિકિટને પણ SMS સાથે જોડવામાં આવતા ST મુસાફરોને કાગળની ટિકિટ સાચવવાની ઝંઝટમાંથી રાહત મળશે. ડિજિટલ સુવિધા તરફ GSRTCનું આ વધુ એક મહત્વનું પગલું છે.
