વહાણમાં આગ લાગતાં ભારે નુકસાન, યમન સરકારે તમામ ભારતીયોને સુરક્ષિત બહાર કાઢ્યા; કોઈ જાનહાનિ નહીં
લાલ સમુદ્રમાં યમનના ઝુકાર ટાપુ નજીક 14 ભારતીય ખલાસીઓ સવાર વહાણ પર હુમલો થતાં વહાણમાં આગ લાગી હતી અને તેને ભારે નુકસાન પહોંચ્યું હતું. જોકે, યમનના સત્તાવાળાઓ દ્વારા હાથ ધરવામાં આવેલી બચાવ કામગીરીમાં તમામ 14 ભારતીય ખલાસીઓને સુરક્ષિત બચાવી લેવામાં આવ્યા છે. આ ઘટનામાં કોઈ જાનહાનિ કે ઈજા થઈ હોવાના અહેવાલ નથી.
મળતી માહિતી મુજબ, સલાલાહ મરીન ટ્રાન્સપોર્ટ કંપની સાથે સંકળાયેલું અને ઓમાનનો ધ્વજ ધરાવતું આ વહાણ 21 ઑક્ટોબર, 2026ના રોજ આગની ઝપેટમાં આવ્યું હતું. વહાણ પર થયેલા હુમલા પાછળ કોણ જવાબદાર છે તે અંગે તપાસ હાથ ધરવામાં આવી રહી છે.
બચાવી લેવામાં આવેલા તમામ 14 ભારતીય ખલાસીઓને લાલ સમુદ્રના કિનારે આવેલા યમનના હુદૈદાહ વિસ્તારમાં એક હોટેલમાં રાખવામાં આવ્યા છે. ત્યાં તેમને રહેવા, જમવા અને કપડાં સહિતની જરૂરી સુવિધાઓ પૂરી પાડવામાં આવી રહી છે.
ભારતીય દૂતાવાસે 23 ઑક્ટોબર, 2026ના રોજ જણાવ્યું હતું કે તમામ 14 ભારતીય નાગરિકો સુરક્ષિત છે. જોકે, તેઓ ભારત ક્યારે અને કયા માર્ગે પરત ફરશે તે અંગે હજુ સુધી સત્તાવાર જાહેરાત કરવામાં આવી નથી.
પ્રાથમિક માહિતી અનુસાર, આ 14 ખલાસીઓમાં ગુજરાતના સલાયા અને સિક્કા ગામના રહેવાસીઓનો પણ સમાવેશ થાય છે. આ ઘટનાને પગલે ખલાસીઓના પરિવારજનોમાં ચિંતા ફેલાઈ હતી, પરંતુ તમામના સુરક્ષિત બચાવના સમાચારથી રાહતનો માહોલ છે.
