ગુજરાતમાં દિવ્યાંગજનોની ગતિશીલતા અને સ્વાવલંબન વધારવા મહત્વનો નિર્ણય લેવામાં આવ્યો છે. વાહન વ્યવહાર કમિશનરની કચેરીએ સાઇડકાર જોડાયેલી મોટરસાઇકલના રજીસ્ટ્રેશન તથા જરૂરી ફેરફારને મંજૂરી આપવા અંગે પરિપત્ર જાહેર કર્યો છે.
નવી વ્યવસ્થા હેઠળ શારીરિક દિવ્યાંગજનો માટે કેન્દ્ર સરકારના નિર્ધારિત ધોરણો મુજબ સાઇડકારવાળી મોટરસાઇકલનું રજીસ્ટ્રેશન અને ફેરફાર કરી શકાશે. રાજ્યની તમામ RTO અને ARTO કચેરીઓએ આ માર્ગદર્શિકાનું પાલન કરવાનું રહેશે.
આ નિર્ણયથી દિવ્યાંગજનોને દૈનિક જીવનમાં વધુ સલામત, સરળ અને સ્વતંત્ર પરિવહનની સુવિધા મળશે. ખાસ કરીને અવરજવરની મુશ્કેલીનો સામનો કરતા દિવ્યાંગજનો માટે આ નિર્ણય રાહતરૂપ બનશે.
મનો-દિવ્યાંગ વ્યક્તિઓ માટે પણ વાહનના રજીસ્ટ્રેશન અને ઉપયોગ અંગે સ્પષ્ટ નિયમો નક્કી કરાયા છે. જેમાં વાલીપણા, વાહનચાલક, સલામતી, ઝડપ મર્યાદા અને માન્ય ડ્રાઇવિંગ લાઇસન્સ સહિતની શરતોનું પાલન કરવું પડશે.
