દિવ્યાંગ કર્મચારીઓને બઢતીમાં અનામત માટે ઉચ્ચસ્તરીય સમિતિ રચાઈ

પાંચ સભ્યોની સમિતિ નક્કી કરશે નીતિ, અન્ય રાજ્યોની વ્યવસ્થા અને કોર્ટના ચુકાદાઓનો પણ અભ્યાસ થશે

રાજ્ય સરકારના દિવ્યાંગ અધિકારી-કર્મચારીઓને બઢતીમાં અનામતનો લાભ આપવા અંગે યોગ્ય નીતિ ઘડવા માટે પાંચ સભ્યોની ઉચ્ચસ્તરીય સમિતિની રચના કરવામાં આવી છે. સરકારના આ નિર્ણયથી રાજ્યના દિવ્યાંગ કર્મચારીઓમાં બઢતીની તકો અને કારકિર્દીમાં સમાન અવસર અંગે નવી આશા જાગી છે.

આ સમિતિના અધ્યક્ષ તરીકે રાજ્યના મુખ્ય સચિવને જવાબદારી સોંપવામાં આવી છે. જ્યારે સામાન્ય વહીવટ વિભાગ (GAD), સામાજિક ન્યાય અને અધિકારિતા વિભાગ, કાયદા વિભાગના ઉચ્ચ અધિકારીઓ તેમજ દિવ્યાંગ વ્યક્તિઓ માટેની કચેરીના કમિશનરને સભ્ય તરીકે સામેલ કરવામાં આવ્યા છે.

= કાયદાકીય જોગવાઈઓ અને કોર્ટના ચુકાદાઓનો અભ્યાસ

સામાન્ય વહીવટ વિભાગ દ્વારા રચાયેલી આ સમિતિ રાજ્ય સરકારની સેવાઓ અને જગ્યાઓમાં દિવ્યાંગ વ્યક્તિઓને બઢતીમાં અનામત આપવા અંગેની પ્રવર્તમાન કાયદાકીય જોગવાઈઓનો અભ્યાસ કરશે.

આ ઉપરાંત ભારત સરકારની સૂચનાઓ તેમજ સુપ્રીમ કોર્ટ અને હાઇકોર્ટના સંબંધિત ચુકાદાઓનું પણ સઘન અધ્યયન કરવામાં આવશે. આ કાનૂની અને ન્યાયિક પાસાઓના આધારે ગુજરાત માટે યોગ્ય નીતિ તૈયાર કરવા અંગે સમિતિ ભલામણો કરશે.

= અન્ય રાજ્યોની નીતિનો પણ તુલનાત્મક અભ્યાસ

સમિતિ માત્ર ગુજરાતની વ્યવસ્થાનો જ અભ્યાસ નહીં કરે, પરંતુ દેશના અન્ય રાજ્યોમાં દિવ્યાંગ સરકારી કર્મચારીઓને બઢતીમાં અનામત આપવા માટે અમલમાં રહેલી નીતિઓ અને જોગવાઈઓનો પણ તુલનાત્મક અભ્યાસ કરશે.

ખાસ કરીને અન્ય રાજ્યોમાં બઢતીમાં અનામતની ટકાવારી, અમલીકરણની પદ્ધતિ અને તેના માટે નક્કી કરવામાં આવેલા માપદંડો જેવા મહત્વપૂર્ણ મુદ્દાઓને ધ્યાનમાં લેવામાં આવશે.

= યોગ્ય નીતિ માટે વિગતવાર ભલામણ

દિવ્યાંગ અધિકારીઓ અને કર્મચારીઓને બઢતીમાં અનામત આપવા માટે ગુજરાતમાં કઈ નીતિ યોગ્ય રહેશે અને તેના અમલ માટે કયા પગલાં જરૂરી બનશે તે અંગે સમિતિ વિગતવાર ભલામણો રજૂ કરશે.

સમિતિને જરૂરી જણાય ત્યારે રાજ્ય સરકારના કોઈપણ વિભાગ કે કચેરી પાસેથી સંબંધિત માહિતી, દસ્તાવેજો અને અભિપ્રાયો મેળવવાની સત્તા પણ આપવામાં આવી છે.

= દિવ્યાંગ કર્મચારીઓમાં નવી આશા

સરકારની આ પહેલથી દિવ્યાંગ કર્મચારીઓ માટે માત્ર ભરતીમાં જ નહીં, પરંતુ નોકરી દરમિયાન બઢતી અને કારકિર્દી વિકાસમાં પણ સમાન તક ઊભી કરવાની દિશામાં મહત્વપૂર્ણ પગલું ભરાયું છે.

હવે સમિતિના અભ્યાસ અને ભલામણો બાદ રાજ્ય સરકાર દ્વારા બઢતીમાં અનામત અંગેની નીતિ તૈયાર કરવામાં આવશે. પરિણામે દિવ્યાંગ કર્મચારીઓ માટે સરકારી સેવામાં કારકિર્દીની વધુ સમાન તકોનો માર્ગ ખુલવાની શક્યતા છે.