ગાંધીનગર: અયોધ્યા દર્શનાર્થે જતા ગુજરાતના શ્રદ્ધાળુઓ અને પ્રવાસીઓને રહેવા સહિતની આધુનિક સુવિધાઓ મળી રહે તે માટે ગુજરાત સરકાર દ્વારા અયોધ્યામાં રૂ.80.25 કરોડના ખર્ચે ભવ્ય **‘યાત્રી નિવાસ’**નું નિર્માણ કરવામાં આવી રહ્યું છે.
મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવીના માર્ગદર્શન હેઠળ અયોધ્યામાં નિર્માણાધીન ટાઉનશીપમાં આશરે 6,929.28 ચોરસ મીટર વિસ્તારમાં આ યાત્રી નિવાસ વિકસાવવામાં આવશે. ગુજરાત પ્રવાસન નિગમ દ્વારા આ પ્રોજેક્ટને આકાર આપવામાં આવી રહ્યો છે.
308 બેડની ક્ષમતા, 864 બેઠકનો વિશાળ હોલ
યાત્રી નિવાસમાં વિવિધ પ્રકારના રૂમ સાથે કુલ 308 બેડની ક્ષમતા રાખવામાં આવશે. આ ઉપરાંત 864 બેઠક ક્ષમતાવાળો વિશાળ હોલ પણ બનાવવામાં આવશે. શ્રદ્ધાળુઓ અને પ્રવાસીઓને વધુ સુવિધા મળી રહે તે માટે અહીં રિસેપ્શન સેન્ટર, વિઝિટર લાઉન્જ, સોવેનીયર શોપ, મલ્ટીપર્પઝ હોલ, ઓડિટોરિયમ, મીટિંગ રૂમ અને ડાઇનિંગ એરિયા જેવી સુવિધાઓ ઉપલબ્ધ રહેશે.
આ સાથે ટેરેસ ગાર્ડન, ડિજિટલ ડિસ્પ્લે અને આકર્ષક લેન્ડસ્કેપિંગ સહિતની આધુનિક સુવિધાઓ પણ વિકસાવવામાં આવશે.
આગામી એક વર્ષમાં ખુલ્લું મૂકવાનું આયોજન
યાત્રી નિવાસનું બાંધકામ શરૂ થઈ ચૂક્યું છે અને આગામી એક વર્ષમાં તેને ગુજરાતના શ્રદ્ધાળુઓ માટે ખુલ્લું મૂકવાનું આયોજન છે. અયોધ્યામાં શ્રી રામ મંદિરની પ્રાણપ્રતિષ્ઠા બાદ અહીં દેશ-વિદેશમાંથી મોટી સંખ્યામાં શ્રદ્ધાળુઓ દર્શન માટે આવી રહ્યા છે. આ પ્રવાસીઓના વધતા પ્રવાહને ધ્યાનમાં રાખીને ગુજરાત સરકારે આ સુવિધા વિકસાવવાનો નિર્ણય લીધો છે.
સરકારના જણાવ્યા મુજબ, આ યાત્રી નિવાસ અયોધ્યા આવતા ગુજરાતના પ્રવાસીઓ અને શ્રદ્ધાળુઓ માટે રહેવા તથા અન્ય જરૂરી સુવિધાઓની અનુકૂળ વ્યવસ્થા પૂરી પાડશે. સાથે જ ગુજરાત અને અયોધ્યા વચ્ચેના સાંસ્કૃતિક અને આધ્યાત્મિક સંબંધોને વધુ મજબૂત બનાવવામાં પણ આ યાત્રી નિવાસ મહત્વની ભૂમિકા ભજવશે.
