રૂ. 2.19 કરોડની એક બસમાં 23 મુસાફરો માટે પ્રીમિયમ સુવિધા; પાંચ બસ તૈયાર, હાલ બેનું લોકાર્પણ
એકતાનગર: ગુજરાતના પ્રવાસન ક્ષેત્રમાં નવીનતમ સુવિધાનો ઉમેરો કરતાં સ્ટેચ્યુ ઑફ યુનિટી ખાતે અત્યાધુનિક એસી ‘વિસ્ટા ડોમ કોચ’ બસ સેવા શરૂ કરવામાં આવી છે. ગુજરાત રાજ્ય માર્ગ વાહનવ્યવહાર નિગમ (GSRTC) અને ગુજરાત ટુરિઝમ દ્વારા સંયુક્ત રીતે શરૂ કરાયેલી આ સેવા પ્રવાસીઓને મુસાફરી દરમિયાન કુદરતી સૌંદર્યનો અનોખો અનુભવ કરાવશે. વડાપ્રધાન નરેન્દ્ર મોદીએ આ બસનું લોકાર્પણ કર્યું હતું અને તેમાં સફર કરીને તેની આધુનિક સુવિધાઓનો અનુભવ પણ લીધો હતો.
પારદર્શક રૂફ ડોમ બનશે મુખ્ય આકર્ષણ
આ બસની સૌથી મોટી વિશેષતા તેની પારદર્શક સ્કાય-વ્યૂ રૂફ ડોમ ડિઝાઇન છે. તેના કારણે પ્રવાસીઓ એસી કેબિનમાં આરામથી બેસીને ખુલ્લા આકાશ અને રસ્તામાં જોવા મળતાં કુદરતી દૃશ્યોનો આનંદ માણી શકશે. બસમાં 23 મુસાફરો માટે રિવોલ્વિંગ અને સંપૂર્ણ એડજસ્ટેબલ રિક્લાઇનિંગ સીટ્સની વ્યવસ્થા કરવામાં આવી છે. આ ઉપરાંત ડ્રાઇવર માટે અલગ બેઠક પણ ઉપલબ્ધ છે.
રૂ. 2.19 કરોડની બસમાં પ્રીમિયમ સુવિધાઓ
દરેક વિસ્ટા ડોમ કોચની કિંમત રૂ. 2.19 કરોડ છે. પ્રવાસીઓની સુવિધા અને આરામને ધ્યાનમાં રાખીને બસમાં પ્રીમિયમ LED સ્માર્ટ ટીવી, CCTV કેમેરા, કોફી-ટી મેકિંગ મશીન, મિની ફ્રિજ અને મોબાઇલ ચાર્જિંગ પોઇન્ટ જેવી સુવિધાઓ આપવામાં આવી છે.
સુરક્ષાની દૃષ્ટિએ બસમાં ફાયર ડિટેક્શન અને ફાયર સપ્રેશન સિસ્ટમ લગાવવામાં આવી છે. સાથે જ ઇમરજન્સી હેમરથી સજ્જ ટફન ગ્લાસની વ્યવસ્થા પણ કરવામાં આવી છે, જેથી કટોકટીના સમયે મુસાફરોને સુરક્ષિત બહાર નીકળવામાં મદદ મળી શકે.
બસ પર ગુજરાતનાં પ્રવાસન સ્થળોનાં આકર્ષક ગ્રાફિક્સ
વિસ્ટા ડોમ બસની બોડી પર ગુજરાતનાં જાણીતાં પ્રવાસન અને ધાર્મિક સ્થળોનાં આકર્ષક ગ્રાફિક્સ દર્શાવવામાં આવ્યાં છે. તેમાં સ્ટેચ્યુ ઑફ યુનિટી, અક્ષરધામ, સોમનાથ મંદિર, દ્વારકા મંદિર, ગીર રાષ્ટ્રીય ઉદ્યાન, અડાલજની વાવ, ધોરડોના રણ, તરણેતરનો મેળો અને વિજય વિલાસ પેલેસનો સમાવેશ થાય છે. આ ડિઝાઇન દ્વારા બસને ગુજરાતના પ્રવાસન વારસાનું પ્રતીકાત્મક સ્વરૂપ આપવામાં આવ્યું છે.
કુલ પાંચ બસ તૈયાર, બાકીની ત્રણ ટૂંક સમયમાં શરૂ થશે
આ પ્રોજેક્ટ અંતર્ગત કુલ પાંચ વિસ્ટા ડોમ બસ તૈયાર કરવામાં આવી છે. તેમાંથી હાલ બે બસોનું લોકાર્પણ કરીને સેવા શરૂ કરવામાં આવી છે. બાકીની ત્રણ બસો આગામી બે મહિનામાં શરૂ કરવાનું આયોજન છે. આ રીતે તબક્કાવાર પ્રવાસીઓને વધુ બસોની સુવિધા ઉપલબ્ધ કરાવવામાં આવશે.
અન્ય પ્રવાસન અને હેરિટેજ રૂટ પર પણ સેવા શરૂ કરાશે
નાયબ મુખ્યમંત્રી હર્ષ સંઘવીએ જણાવ્યું હતું કે, આગામી સમયમાં ગુજરાતનાં અન્ય પ્રવાસન સ્થળો અને હેરિટેજ રૂટ્સ પર પણ તબક્કાવાર આ પ્રકારની અત્યાધુનિક બસ સેવા શરૂ કરવામાં આવશે. પ્રવાસીઓ GSRTCની સત્તાવાર વેબસાઇટ પરથી ટિકિટ બુક કરાવી આ સેવાનો લાભ લઈ શકશે.
આ નવી સેવા શરૂ થવાથી સ્ટેચ્યુ ઑફ યુનિટીની મુલાકાતે આવતા પ્રવાસીઓને મુસાફરીનો નવો અનુભવ મળશે. સાથે જ ગુજરાતના પ્રવાસન ક્ષેત્રમાં આધુનિક પરિવહન સુવિધાઓનો પણ ઉમેરો થશે.
